Nagpagwa sang panibag-o nga mga alegasyon ang pila ka anay bodyguards ni former Ako Bicol Party-list Representative Zaldy Co matapos nila ginhingadlan ang pila ka mga opisyal sang gobyerno kag mga personalidad sa media nga ginaalegar nakabaton sang kwarta naggikan sa anay mamalidha.
Sa isa ka press conference kahapon, ginpakilala ni Atty. Levi Baligod ang apat ka mga bag-o nga testigo.
Isa sa ila ang nagpahayag nga nag-upod ini sa pagdul-ong sang mga maleta para kanday House Speaker Martin Romualdez kag Senator Erwin Tulfo.
Nalakip man sa ginhingadlan si Commission on Elections (COMELEC) Chairperson George Garcia, apang gilayon man ini nga ginpanginwala sang opisyal.
Nagpakita man ang mga testigo sang mga litrato ni Senator Kiko Pangilinan kag Sharon Cuneta kaupod ang pila ka mga tinawo ni Co.
Apang wala sila sang naghatag sang dugang detalye kun ano ang kaangtanan sini sa mga alegasyon.
Gilayon man nga nagsabat si Cuneta pinaagi sa social media post nga kabutigan lamang ang mga alegasyon batok sa ila.
May ginpakita man sila nga litrato kaupod si MMDA General Manager kag anay PNP Chief Nicolas Torre.
Samtang, ginbuyagyag man sang mga testigo nga nagdul-ong man sila sang mga paper bag nga may unod nga kwarta sa pila ka mga personalidad sa media kalakip sanday TV journalist Arnold Clavio kag kolumnista nga si Mon Tulfo.
Ginpanginwala man ini ni Clavio kag ginhangkat ang mga nag-akusar nga magpakita sang ebidensya samtang, ginkadlawan lamang ni Mon Tulfo ang alegasyon.
Samtang ginbuyagyag sang isa ka nagpakilala nga anay bagman nga kabahin ini sang grupo nga nagdeliver sang maleta nga may kwarta kay Sen. Francis “Chiz” Escudero sa New Manila sadtong 2024.
Sa isa ka press conference, ginpahayag sang testigo nga apat ka maleta ang ila gindul-ong sa puluy-an sang senador.
Suno pa diri, ginkilala sila bilang “advance team” sa nasambit nga operasyon kag nakasulod pa sa balay ni Escudero sa diin sila ang ginpapanyapunan pa.
Wala pa naghatag sang pahayag si Escudero natuhoy sa alegasyon.
Samtang, duha man ka nagpakilala nga anay bodyguards ni Co ang nagbuyagyag nga nagdeliver man sila sang male-maleta nga kwarta kay Pres. Ferdinand “Bongbong” Marcos Jr.
Sa separado nga pahayag, ginpahayag nila nga gindala pa sa nagkalain-lain nga lokasyon ang mga maleta antes gindala sa Ilocos.
Ginpanginwala naman sang Malacañang ang mga alegasyon kag gintawag nga “garbage” ang mga alegasyon.
