Nagpalupok sang tear gas ang mga kapulisan sa Paris agud ma-kontrol ang mga nagapatigayon sang hublag-protesta kahapon.
Naglapta ang linibo ka mga raliyista sa nagkalain-lain nga parte sang France para sa pagpanawagan sang dugang nga pondo para sa edukasyon.
Ang nagalala nga protesta ang naghatag sang dako nga pressure sa administrasyon ni President Emmanuel Macron sa diin patapos na ang iya nga termino.
Ginabanta masobra 250,000 ka mga raliyista ang nag-akupar sa mga dalanon sa Paris lakip ang mga estudyante kag mga manunudlo.
Ang ini nga protesta ang nag-umpisa lamang sa isa ka high school sa Paris region sang Setyembre kag ini ang naglapta na sa bug-os nga pungsod.
Ginkondenar naman sang mga ginikanan kag mga manunudlo ang mga otoridad sa paggamit sang tear gas, kag mag riot-control nga mga armas, kasubong man ang pag-aresto sa mga kabataan.
Suno kay French Prime Minister Sébastien Lecornu, dapat pamatian sang gobyerno kag mga lider sang mga buluthuan ang panawagan sang mga kabataan kag gilayon nga himuan sang tikang kag solusyon.
