Gin-athag ni Bacolod City Legal Office Head Atty Romeo Carlos Ting Jr. nga kasunod sang evaluation sa mga nagapuyo sa Burgos Public Cemetery, sila ang indi na eligible nga makabatun sang relocation bangod sila ang na-awardan na sadto sang balay apang wala man nila gin-estaran.
Madumduman nga sang Martes, ginpatigayon ang demolition sang mga illegal structures nga gintukod sang anom kapamilya nga ginhimo na nga balay ang Burgos Public Cemetery.
Sa diin, nakita sa mga hayob-hayob nga gintukod nila sa ibabaw sang mga pantyon ang pila ka mga kagamitan kaangay sang washing machine, electric fan, suga kag iban pa.
Dugang pa nga may mga aluminum foil nga nakita sa mga hayob-hayob gani indi madula ang posibilidad nga ang lugar ang ginahimo man nga ruru-an sang mga nagagamit sang iligal nga droga.
Sa interview sang Bombo Radyo Bacolod kay Ting, gin-athag sini nga napahalin na nila ang mga naga-istar sa sementeryo.
Dugang pa sini nga may duha ka tigulang pa nga naghambal nga sila ang wala sang mapulian apang sang ginpadulungan sang Department of Social Services Division (DSSD), ang mga ini ang may ginpulian man nga pamilya diri sa ciudad sang Bacolod.
Apang nakita sini nga mas huyog sang mga ini nga magpuyo sa Burgos Public Cemetery bangod libre ang kuryente ilabi na nga sila ang nagatap derekta sa poste sang Central Negros Electric Cooperative (Ceneco).
Suno kay Ting, gin-evaluate sang Bacolod Housing ang mga residente apang sila ang gindisqualify matapos matumod nga may pangalan na ang mga ini sa mga nahatagan sang relocation housing apang wala nagpuyo sa ginhatag nga balay.
Sa karun, indi naman makabalik ang mga nasambitan nga pamilya bangod nakay-o na ang perimeter wall sa palibot sang sementeryo kag sa entrance na lamang mahimo makalabay kag may-ara naman sang nagabantay nga Public Order and Safety Office (POSO) guard.
Apisar nga wala na ginalubungan sa karun ang Burgos Public Cemetery, madamo gihapon sang mga nagaduaw diri partikular na sa piyesta minatay, gani panindugan ni Ting nga madamo sang magareklamo kun sa ila nga pagbisita, may balay-balay na nga gintukod sa pantyon sang ila nga mga minatay.
