Indi magnubo sa P500, 000 tubtub P600, 000 ang utang sang kada nagapanag-iya sang kalan-an sa Manokan Country sa Bacolod City government.
Sa interview sang Bombo Radyo kay David Montoya, presidente sang asosasyon sa Manokan Country, nakaistorya na sa ila si Bacolod City Councilor Celia Flor kag nakasugtan nga sumahon ang tanan nila nga balayran agud nga matumod ang arrears kag ang principal nga amo ang bayaran sang amat-amat kada bulan.
Sa karon, may yara sang 22 ka stalls sa Manokan Country kag siyam lang ang nakabayad sang full gani wala sila sang utang sa city government.
Kada bulan, ang mga may kalan-an sa Manokan Country ang nagabayad sang P2,025.
Aminado si Montoya nga halin pa sa pagtindog sang Manokan Country sang 1986, may yara na sila sang utang sa ciudad bangud wala naplastar ang collection system kag wala man sang collector.
Nagsugod lang ang collection sang 1997.
Suno kay Montoya, ginsettle sang Leonardia administration ang mga balayran sang yara sa Manokan Country kun sa diin nagbayad sila sang P200 kada bulan apang nagasulod lang sa interest ang ila nga ginabayad.
Sa karon, indi magnubo sa P500, 000 tubtub P600, 000 ang balayran sang mga nagapwesto sa Manokan Country.
Gin-ako man sini nga wala sila nahatagan sang business permit bangud may yara sila sang arrears sa city government.
Naghingyo naman ini sa iya mga kaupod sa asosasyon nga seryosohon ang pagbayad sang ila nga arrears.
