Nagdamo na subong nga hapon ang mga residente nga nagbisita sa Bacolod Arts and Youth Sports Center agud nga magpaidalom sa swab test kadungan sang una nga adlaw sang mass testing sa ciudad sang Bacolod subong nga Biyernes.
Sa pagbisita sang Bombo news team kaina sang udto, tuman kalaka ang tawo sa BAYS Center, apang amat-amat man nga nagdamo halin ala-una subong nga hapon tubtub subong nga tinakna.
Nahibaluan nga isa lamang ang BAYS Center sa madamo nga testing centers sa nagkalain-lain nga barangay sa ciudad.
Kadungan sang timeout weekend, ang sarang nga makapaidalom sa reverse transcription polymerase chain reaction test nga libre amo ang close contact sang isa ka confirmed COVID 19 positive patient; mga immunocompromised ukon mahina ang immune system bangud may yara sang pre-existing conditions; mga tawo nga nagabatyag sang sintomas kaangay sang ubo, hilanat, nadulaan sang panabor kag panimaho; kag vulnerable individuals kaangay sang senior citizens, nagabusong, persons with disability, business process outsourcing employees, mga pulis, empleyado sang city government kag mga frontliners.
