Diutay na lamang ang mga bisita nga nagpadulong sa Burgos Public Cemetery kagab-i bangod wala sang kuryente sa nasambitan nga sementeryo.
Sa pagpadulong sang Bombo News Team sa area, ginkakibot nga kandila na lamang kag flashlights gikan sa mga bisita ang nagahatag kasanag sa sementeryo.
Bangod sini, pipila na lamang ang makita nga bisita sa Burgos Public Cemetery alas-8:30 kagab-i indi kaangay tinalikdan nga mga tinuig nga alas-12:00 sang tungang gab-i puno gihapon ang lugar.
Sa interview sang Bombo Radyo Bacolod kay Ronnie Jagocoy, sepulturero sa Burgos Public Cemetery, sa malawig sini nga tinuig nga pagtrabaho bilang sepulturero karun lang nadulaan sang kuryente sa nasambitan nga sementeryo.
Bangod sa masanag sadto, madamo gihapon sang mga nagabisita sa ila minatay apisar pasado na alas-12:00 sang tungang gab-i.
Aminado man ini nga mahina ang ila kita subong nga tuig bangod kalabanan sang mga nagabisita ang nagadala na mismo sang kaugalingon nga pinta kag sila na ang nagatrabaho.
Dugang pa sa nagpahina sang ila nga negosyo bangod ginsarado na ang sementeryo kag kalkal na lamang ukon transfer ang ginapahanugutan.
Sila ang makaganar lamang kun may-ara sang wasak nga pantyon.
Ang sukot ni Jagocoy ang yara sa P500 kag ini ang may kaupod naman nga pagpanghilamon magluwas sa pagpinta sa pantyon, apang sa masami ini ang gina-ayo pa tubtob P100.
Nagalaom ini nga madamo pa ang magakontrata sa iya sa pagpinta sang pantyon subong nga adlaw ilabi na nga Nobyembre 2, All Souls Day ukon mismo adlaw sang kalag.
