Nagdangat sa 700 ka mga indibidwal ang nagbisita sa Burgos Public Cemetery kahapon, Oktubre 31.
Sa interview sang Bombo Radyo Bacolod kay Police Major Marc Joel Reclamado, station commander sang Police Station 4, ang mga nagbisita ang nagpanglimpyo kag nagsindi sang kandila sa ila nga mga minatay.
Suno kay Reclamado nga ginalauman nila subong nga adlaw ang madamo nga mga bisita sa nasambit nga sementeryo.
Ginapangabay sang station commander sa magabisita sa nasambit nga sementeryo nga likawan ang pagdala sang mga ginadumilian sa sulod sang patyo kaangay sang mga makahulubog nga ilimnon, mga matalom nga bagay kag pagpanahor ukon gambling.
Napulo ka police personnel nagikan sa Bacolod City Police Station 4 ang gindeploy sa Burgos Public Cemetery.
May yara man sang apat ka personnel nagikan sa sa Bacolod City Fire Station kag isa ka fire truck.
Dugang pa sini nga may dugang nga augmentation nagikan sa Revitalized-Pulis sa Barangay ukon RPSB nga anum kag may yara man sang anum ka traffic enforcement unit personnel nga nag-augment sa paghandle sang traffic.
Ginalauman nga linibo ka mga tawo ang magabisita sa Burgos Public Cemetery ilabi na kun magmaayo ang tiyempo.
