Sarang na nga makakuha sang plastic nga driver’s license ang mga nagkuha ukon nagparenew sang lisensya sang bulan sang Abril tubtub bulan sang Hulyo.
Madumduman nga temporaryo nga gin-untat ang pag-issue sang plastic nga driver’s license bangud ginkasuhan sang losing bidder ang winning bidder.
Suno kay Riza Otayde, spokesperson sang Land Transportation Office Region 6, nag-abot ang mga plastic cards sang Setyembre 5 subong nga tuig, kasunod sang pagpapanaog sang korte sang temporary restraining order batok sa winning bidder.
Nagsugod naman ang pagrelease sang plastic driver’s license para sa mga nagawalk-in nga nagakuha ukon nagarenew.
Suno kay Otayde, ang mga nagkuha sang lisensya sang bulan sang Abril tubtub Hulyo nga nakabaton lang sang papel nga lisensya kag magarequest na nga makuha sang plastic nga driver’s license ang ila na gina-cater.
Ginahatagan naman sang prayoridad ang mga OFWs nga kinahanglan na magbalik sa luwas sang pungsod basta makapangita ini sang nagakaigo nga papeles nga malapit na ang ila flight.
Samtang, wala naman sang pagbag-o sa fees nga ginabayaran sang magarenew sang lisensya.
