Ginpanindugan sang Punong Barangay sang Barangay 12, Bacolod City nga mga construction workers ang nagapangawat sang mga materyales kag indi ila residente ang nagapangawat sang materyales sa Bacolod Vendors Plaza.
Sa interview sang Bombo Radyo Bacolod kay Punong Barangay JR Alcantara, sa vendors plaza sila nagpractice sang Masskara sumugod sang Setyembre kag didto pa lamang natalupangdan na nila nga madamo na sang nadula nga materyales, kalakip na ang mga atop kag kabilya.
Sang nagluntad ang dako nga sunog sa Barangay 16 sang Hulyo, ginpahayag man sang mga construction worker nga ila-idonar ang mga atop sa nasunugan, gani nagpinsar ang Punong Barangay nga sila ang ginhatagan sang clearance.
Apisar nga perimeter fence pa lamang ang ginpatukod, nag-umpisa na ang mga ini sa pagpangbaklas sang mga pagkabutang kag sa karun halos 50 porsyento na lamang ang nabilin antes paman ang demolition.
Sa karun ang nasambitan nga mga construction workers ang nalay-off na apang kaangay nga naanad na kag nagabalik-balik gihapon sa area.
Indi man ang mga ini masaway gani siya ang nagpatukod sang basketball court, agud indi mahilabtan sang mga nagapangawat bangod may nagagamit.
Pasalig sini nga indi nila pumuluyo ang nagapangawat bangod ang mga ini ang nahadlok kag nakahibalo nga ang propidad ang iya sang gobyerno.
