Mas nagdamo pa ang nagpadulong sa sattelite voter’s registration sa University of St. Lasalle (USLS) Bacolod subong nga adlaw kun ipaanggid kahapon.
Madumduman nga kapin dos mil ang mga nagpila agud magparehistro kahapon, apang 500 lang ang ginacater kalakip na sa mga priority sectors.
Suno kay Bacolod City Mobile Force Company Head P/Lt Col Ariel Pico, madamo sang mga luyag nga magparehistro apang ginakasubo sini nga 350 ka mga regular registrants lang ang marehistro sang Commission on Election (COMELEC) Bacolod personnels.
Ini ang pagadugangan naman sang priorities nga ginalakipan sang senior citizen, persons with disability, nagabusong kag mga online applicants.
Subong nga aga, nagdangat sa kapin 2,500 ang mga nagpila sa satellite registration.
Ginkumpirmar man ni Pico nga may isa ka babayi nga nalipungan samtang nagapila nga gilayon naman ginrespondihan sang mga kapulisan.
Ginpasalig man sini nga permi nga nakahanda sa pagserbe ang mga kapulisan agud mapabilin ang kalinong kag katawhayan sa voter’s registration.
Suno kay Pico tubtob sa Biyernes pa sila nga magabantay sa satellite registration sa USLS Bacolod.
Pahanumdom sini sa mga magapadulong sa registration site nga magbalon sang payong bangod indi mapakot ang dalagan sang tiyempo, pagkaon kag tubig agud preparado sa malawig nga pila.
Pahayag sini nga tatlo ka shift ang kapulisan nga nagabantay sa registration site kun sa diin may-ara sang nagaduty antes pa ang alas-10:00 sang gab-i kag may nagabulos sa alas-2:00 kag alas-4:00 sang kaagahon.
Kalakip sa nagaseguro sang pila sa USLS voter’s registration amo ang Bacolod City Mobile Force Company, Bacolod Police Station 4, City Legal Office, Bacolod Traffic Authority Office (BTAO) kag Task Force Disiplina.
