Ginpatpat sang focal person sang City Anti-Drug Abuse Council (CADAC) nga isa ka bulan lamang sarang na nga makatapos sa rehabilitation ang mga nagpositibo sa illegal drug use kun sila ang desidido nga magbag-o.
Sa interview sang Bombo Radyo Bacolod kay retired Police Brig. Gen. Primitivo Tabujara Jr., nakadepende sa screening kag assessment sang Bacolod City Health Office ang pagtumod kun ang isa ka drug user kun low, moderate ukon severe na ang epekto sang droga sa ila nga lawas.
Suno diri, minimum nga 1 month tubtob 3 months lamang kag mahimo na nga makatapos sa Community-based Drug Rehabilitation Program ang mga yara sa low risk, 6 months naman ang moderate risk apang ang mga severe, ang ginapadala sa treatment and rehabilitation center sa Iloilo.
Panawagan naman ni Tabujara sa mga yara sa gobyerno nga nagagamit sang iligal nga droga nga indi na pag-uyangan ang trabaho nga nabatun.
Pahanumdom sini nga ang sweldo nga dapat nga makakadto pa sa pamilya ang nagatupa lamang sa bisyo sang mga drug user.
Isa pa sa ginakasubo sini bangod duha ka job order casual nga nagatrabaho sa Social Security Center para sa mga menor de edad, ang natukiban nga positibo sa paggamit sang iligal nga droga.
Ginakahangawa sini nga kun indi maidid nga matsekyar sang supervisors ang ila nga mga hulag, mahimo nga makalab-ot pa sa mga kabataan ang iligal nga droga.
Nahibaluan nga 80 tubtob 90 porsyento nga yara sa Social Security Center ang tuga man sang illegal drug use.
Nagalaom si Tabujara nga ang pagkadiskubre sa mga illegal drug users sa talatapan sang gobyerno ang makapabugtaw na sa iban pa nga empleyado agud likawan ang iligal nga buluhaton nga makahuluya sa publiko.
Agud malikawan ang kaangay nga mga insidente, bilang pinuno sa CADAC, igarequire naman ni Tabujara sa hiring process sa tanan nga law enforcement agencies sa Bacolod ang drug testing samtang magapatigayon man sila sang background check.
Kun yara na sa watchlists, ang mga ini ang ipaidalum naman sa operasyon sang Bacolod City Police Office (BCPO).
