Nagdangat sa 150,000 ang estimated crowd sa concert nga ginpatigayon sa Bacolod City Government Center kagab-i, kun sa diin isa sa nagperform ang Pinoy Boyband nga SB19.
Sa interview sang Bombo Radyo Bacolod kay Bacolod Traffic Authority Office (BTAO) Deputy Head Jose Antonio “Jojo” Robello ang iya pagbanta yara sa 240,000 ang crowd kagab-i apang 150,000 lamang ang ginpagwa nga estimate sang Bacolod City Police Office (BCPO)
Suno sa iya, gin-adjust man sang BTAO ang pagpatuman sang full road closure sa palibot sang festival site.
Sa orihinal nga plano maga-umpisa alas-7:00 sa gab-i ang full closure sang dalan, apang bangod nakita nga indi paman tuman ka damo ang visitor gani ini ang ila gin-adjust sa alas-8:00 sang gab-i.
Samtang ang concert ang natapos kapin alas-10:00 sang gab-i pa lamang gani temprano man nila ginbuksan ang dalan nga kuntani buksan alas-12:00 sang kaagahon.
Sa pihak nga bahin, ginrelease man nila ang truck ban alas-11:00 sang gab-i.
Wala naman sang dalagkuan nga insidente nga nagluntad magluwas na lamang sang report sang nadulaan sang cellphone kag nadula nga bata, nga gilayon man nga nabalik sa ginikanan.
Sila ang nagakoordinar man sa kapulisan kag iban pa nga security agencies kag wala man sang narecord nga medical emergency.
Mismo si Bacolod City Mayor Alfredo “Albee” Benitez ang nagpabutyag naman sang kalipay sa security plan nga ginapatuman sa Masskara Festival 2024.
Sa coronation night sang Miss Bacolod Masskara sa Bacolod La Salle Coliseum, sila ang magadeploy naman sang apat tubtob anom ka traffic enforcer kag supervisor.
Liwat nga magapatigayon sang events bwas sa gab-i nga tambungan naman sang pila ka mga singer kag artista.
Panawagan ni Robello nga temprano pa nga magpadulong sa festival sites agud makapark sang mga salakyan samtang bukas pa ang dalan, kag ang mga indi magalantaw ang mas maayo nga magpangita na lamang sang alternatibo nga dalan agud indi ma-ipit sa mabug-at nga traffic.
