Nagdangat sa 7,685 ka mga balay ang partially damage samtang 1024 naman ang totally damage bangud sa Bagyo Tino sa Bacolod City.
Sa interview kay Dr. Ritchelle Verdeprado-Mangga, pinuno sang Department of Social-Services & Development (DSSD)-Bacolod, nagapadayon ang ila validation sang mga nagkalaguba nga mga balay bangud sa Bagyo Tino.
Suno kay Mangga target nila kuntani matapos ang validation subong nga adlaw apang bangud nagainulan posible nga sa madason gid nga semana matapos ang validation.
Suno diri, 36 pa lang ka mga barangay ang ila nga nalibot sa ginapatigayon nga validation.
Ginpahayag man sini nga ang social worker mismo ang nagapanguna sa validation bangud may yara ang mga ini sang training sa paglantaw sa socio-economic status sang mga pumuluyo.
Wala man sila nagabase sa mga pictures lamang agud nga masiguro nga ang mahatagan sang assistance amo ang apektado gid nga mga residente.
Ginbag-o man ang guidelines sang paghatag sang ayuda bangud tuman kadamo ang mga apektado sang naglabay nga Bagyo Tino.
Wala pa sa karun mahibaluan kun pila ang mabaton nga financial assistance sang mga naapektuhan nga mga residente.
