Igasaylo na sa masunod nga semana ang mga na-impound nga salakyan sa napulo ka police stations sa Bacolod City sa isa ka ektarya nga lote nga ginpahulam sang City Government malapit sa Gate 2 sang BREDCO Port.
Sa pagtsekyar sang Bombo News Team sa Bacolod Police Station 2, nga amo ang may pinakamadamo nga na-impound nga salakyan, nakita nga indi lamang sa atubang kag sa kilid sang estasyon may mga salakyan kag motorsiklo, bangod madamo pa sa likod sini.
Sa interview sang Bombo Radyo Bacolod kay Bacolod City Police Office Director Police Col Eugene Rebadomia, kaangay nga scrappan na ang duag sang mga police stations bangod sa nagatambak nga mga guba nga salakyan kag motorsiklo.
Dugang pa sini nga iban diri ang halos 10 ka tuig na nga naka-impound.
Gani luyag niya nga malimpyuhan na ang Bacolod Police Station 1 tubtob 10.
Sa karun ginaplastar na nila ang 1 hectare nga impounding area nga ginpahulam sang ciudad nga wala sang bayad.
Ini ang hamtangan man sang security, kag may iga-assign man nga personnel incharge sa pagpull-out sang mga salakyan nga may-ara na sang court order kag iclaim na sang tag-iya.
Nahibaluan nga kalabanan sa mga impounded vehicles ang imbulbado sa aksidente, kag mga gingamit nga accessories sa krimen.
Ang impounding area ang separado pa sa impunding area nga ginpagamit naman sa Bacolod Traffic and Transport Management Department.
Suno kay Rebadomia, ginahitso pa nila ang towing, samtang ginatun-an man kun paano mabaki-baki sa 10 ka police station ang impounding area.
