Nagdangat sa 2,300 ang mga pasyente nga nakabenepisyo sa ‘Lab for All’ Caravan ni First Lady Liza Araneta Marcos.
Ang aktibidad ang ginpatigayon sa gymnasium sang University of Negros Occidental – Recolletos (UNO-R) kaina sang aga kun sa diin sila ang naghatag sang libre nga konsulta kag bulong sa dos mil nga benepisyaryo nga ginalakipan sang 1,500 nga pre-listed nga mga beneficiaries kag dugang nga 500 nga mga walk-in patients kag 300 nga pregnant women.
Ginhatagan naman sang prayoridad ang mga nagabusong nga ginhatagan sang ‘Nanay Kit’ samtang ang mga pasyente nga nakasaklay ang ginhatagan man sang libre nga wheelchair.
Ang mga pasyente ang magasaka sa van kun sa diin nakahamtang ang mga doktor nga magakonsulta, kag kun kinahanglan sang laboratory test kag iban pa, sila ang ginarefer naman sa iban nga area.
May iban pa nga mga bulig gikan sa nagkalainlain nga ahensya sang gobyerno kaangay sang PhilHealth, Commission on Higher Education, PAG-IBIG, TESDA, Public Attorney’s Office kag Philippine Charity Sweepstakes Office (PCSO).
Nagpatigayon man sang payout ang Department of Social Welfare and Development (DSWD) nga P2,000 sa kada isa.
Yara sa aktibidad si Bacolod City Mayor ‘Albee’ Benitez, Congressman Greg Gasataya, mga konsehal kag Punong Barangay sa Bacolod City, kasubong man pila ka opisyal gikan sa Negros Occidental Provincial Government kag mga pamunuan sang nagkalainlain nga ahensya sang gobyerno.
Sa amphitheatre naman ginpatigayon ang pagturn over sang Lab for All Van, nga equiped sang medical equipments para sa ciudad sang Bacolod.
Nagprovide man ang mga ini sang pamahaw sa mga bisita.
