Nahatag na ang cash incentives para sa mga student athletes sang Bacolod City nga nakakuha sang medalya sa Negros Island Region Athletic Association (NIRAA) Meet 2026.
Suno kay Lila Vaflor Arro, public information officer sang DepEd division of Bacolod City, nag-alokar ang Bacolod City Government sang P4,167,000 nga budget para ipanagtag sa mga athletes, coaches, assistant coaches, chaperones, kag trainers.
Sa elementary boys, 32 ang nakakuha sang gold medal, 61 ang nakakuha sang silver medal kag 56 sa bronze medal.
Samtang, sa elementary girls, 58 ang nakakuha sang gold medal, 47 ang may bronze medal kag 32 ang may bronze medal.
Sa secondary boys, 134 ang nakakuha sang gold medal, 47 ang may silver medal, kag 41 ang may bronze medal.
Samtang sa secondary girls, 114 ang nakakuha sang gold medal, 54 ang may silver medal kag 68 ang may bronze medal.
Sa para games, 27 ang nakakuha sang gold medal, 25 ang may silver medal, kag 7 ang may bronze medal.
Suno kay Arro, 41 ka elementary athletes sang Bacolod City ang marepresenta sa rehiyon sa Palarong Pambansa, 136 ang representatives sa secondary level kag 11 sa para games.
Ang athletes nga nakakuha sang medal nakabaton sang P5,000 per gold medal; P4,000 per silver medal; kag P3,000 per bronze medal.
Apang magluwas sa athletes ang mga coaches nga may team nga nakakuha sang medal nakabaton sang P7,000 sa gold medal; P5,000 sa may silver medal; P3,000 sa may bronze medal; kag P1,000 sa non-placers.
Ang assistant coaches kag chaperone nakabaton man sang P5,000 kun ang team nila may gold medal; P3,000 sa may silver medal; kag P2,000 sa may bronze medal.
Samtang, ang trainers naman nakabaton sang P4,000 kun may gold medal ang ila team; P2,500 sa may silver medal; kag P1,500 sa may bronze medal.
