Ginakonsiderar sang pinuno sang Provincial Environment and Natural Resources Office sang Negros Occidental ang mga empleyado sang Silay City Government nga napatay sa aksidente matapos lamang ang tree planting activity bilang mga ‘environmental heroes.’
Sa interview sang Bombo Radyo Bacolod kay PENRO Head Joan Nathaniel Gerangaya, sa bulan sang Hunyo ginaselebrar ang Environmental Month kag kada local government units ang may schedule sang tree planting activity.
Sang Hunyo 25, ginselebrar man ang Harbor Day.
Suno kay Gerangaya nga nagakaigo gid ang tion sa pagtanom sang kahoy ang subong nga tiyempo bangod naga-umpisa na ang pag-ulan ulan.
May obligasyon man ang mga LGUs sa pagrehabilitate sang mga areas nga wala sang kahoy sa idalom sang National Greening Program agud maprotektahan kag maconserve ang mga watersheds.
Ginadayaw gid sini kag ginapasalamatan ang tanan nga mga government employees kag volunteers nga nagapasakop sa kaangay nga mga aktibidad.
Gani nagakasubo gid ini sa pagkatumba sang mini dump truck sa Sitio San Juan, Barangay Guimbalaon, Silay City kahapon nga nagasakay sang mga Job Order casuals nga gikan sa tree planting activity sa Barangay Lantad, Silay City sa sulod sang Northern Negros Natural Park.
Ang aksidente ang nagresulta sa pagkapatay sang pito, lima ang kritikal kag 12 nga nag-angkon sang minor injuries.
Ang mga ini ang matawag naman ni Gerangaya nga ‘environmental heroes,’ kag nagalaom ini nga mapreserve ang mga seedlings nga ila gintanom.
Ginalantaw man sini ang posibilidad nga madedicate ang mga natanom nga kahoy sa pangalan sang mga nagtaliwan.
