Nagapabilin pa sa ospital sa ciudad sang Bacolod ang mga biktima sang natumba nga bus sang Bacolod City government sa Purok Talos, Brgy Igmaya-an, banwa sang Salvador Benedicto, kahapon sang hapon.
Sa interview sang Bombo Radyo kay Police Captain Ignacio Javier, Deputy Chief of Police sang Don Salvador Benedicto Municipal Police Station, halos tanan nga pasahero ang napilas kag iban ang nag-agom sang serious injury.
Ginapasalamatan man nila nga may nakalabay nga nurse nga babayi sa area nga naghatag sang bulig sa mga biktima, samtang nagbulig man ang mga residente sa lugar para nga mapadali ang pagpagwa sa mga biktima sa bus agud gilayon nga madala sa Corazon Locsin Montelibano Memorial Regional Hospital kag Bacolod Adventist Medical Center.
Kagab-i nagpabilin naman didto ang mga kapulisan para magbantay sa mga gamit nga nabilin gikan sa nagluntad nga aksidente.
Suno kay Johnny Alimon, driver sang ambulance sang Salvador Benedicto, ginkarga sini ang walo ka mga biktima nga ginalakipan sang isa ka babayi , anom ka lalaki kag isa ka menor de edad nga bata nga babayi.
Suno diri, una nga gindala sa Corazon Locsin Montelibano Memorial Regional Hospital ang mga biktima apang iban sa ila ang wala naakomodar kag gintransfer na lamang bangod nga gutok na ang ospital.
