Ginkumpirmar sang hepe sang Silay City Police Station nga yara na sa maayo nga kahimtangan ang mga biktima nga nasamaran sa shooting incident sa Hacienda Buyong-buyong, Brgy Bagtic, Silay City, Negros Occidental kahapon sang aga.
Sa interview sang Bombo Radyo kay PLt Col Edison Garcia, hepe sang Silay City Police Station, yara na sa maayo nga kahimtangan ang mga napilasan nga biktima samtang ang suspek padayon pa ang ila pagpatigayon sang hot pursuit operation.
Suno kay Garcia, personal grudge ang ginalantaw nga motibo sang shooting incident.
Madumduman nga naggikan sa barangay Guimbalaon ang biktima nga si Sarbject Kaur, residente sang Eufemia Subd., barangay Taculing , Bacolod City, kaupod ang isa pa gid ka indibidwal nga amo ang iya driver.
Nagabyahe ang duha sakay sa motorsiklo kun sa diin ginsundan sila sang motorsiklo sakay ang suspek nga si Manpreet Brar, alyas “Pritch”, nga residente sang Bacolod City.
Gintiro ni Brar si Kaur kun sa diin nag-agom ini sang igo sa nagkalain-lain nga bahin sang iya lawas.
Sang natumba ang motorsiklo nga ginsakyan ni Kaur, gintinguhaan sini nga magbangon kag amo man nga may naglabay nga cab nga may sakay nga pasahero nga iya ginparahan.
Nagdesisyon ang driver sang cab nga pasakyon si Kaur amo nga nag-untat ini kag naghingagaw ang biktima saka sa cab kun sa diin naghapa na lang ini sa salog.
Samtang si Brar naman naglaot pa para tiruhon si Kaur kag bisan naghingagaw pa ang cab dali-dali papalayo sa area, nagpadayon sa pagtiro si Brar.
May tatlo ka pasahero sang cab ang nasalabat kag ginhingagaw na sang driver dala sa barangay hall sang barangay Guimbalaon ang mga biktima agud mahatagan sang nagakaigo nga pagbulong.
Ang mga nasalabat amo sanday Aaron Parojillo, 52 anyos, residente sang Hda Azucena, barangay Bagtic, Silay City; Vicente Moises, 76 anyos, residente sang Hda Mansiguinon, barangay Guimbalaon, Silay City; kag Isidro sang barangay Bagtic, Silay City.
Suno kay Garcia, nakaagi na away ang duha kag mahimo personal grudge ang motibo sa krimen.
Sadto nag-agom man sang pilas si Kaur bangod sa pagpamuno nga ginhimo ni Brar apang wala napasakaan sang kaso ang suspek.
