Dyutay na lamang ang mga illegal campaign materials nga napangsikop sa Operation Baklas sang Bacolod City nga ginpatigayon subong nga adlaw, una nga adlaw sang local campaign period.
Ang Commission on Elections (COMELEC) personnel ang nagsupervise sa tatlo ka team nga nagpangbaklas sa North, South kag East sang dalan Lacson.
Ang Operation Baklas ang ginsuguran alas-9:00 sang aga halin sa South Capitol Road, nga ginpartisiparan sang City Disaster Risk Reduction and Management Office, City Engineer’s Office, City Legal Office kag Bacolod Environment and Natural Resources Office.
Natalupangdan ang dyutay nga mga illegal campaign posters nga mahimo amat-amat na nga ginpanghimos kahapon.
Nahibaluan nga una na nga gin-abiso sang Comelec nga paluson sang kandidato kag ila supporters ang mga campaign materials kun luyag pa nila nga mapuslan, bangod kun ini ang makuha sa baklas operation, indi na ang mga ini mabalik sa politiko.
Sa interview sang Bombo Radyo Bacolod kay Bacolod City Election Officer Atty Revo Sorbito, dapat nga mangin observant ang mga botante sa hulag sang kandidato.
Samtang mensahe naman sini sa mga kandidato, nga sila ang dapat nga magserbe nga modelo sa pagsunod sa campaign regulations.
Sa pihak nga bahin, magapadala naman sila sang notice to remove kun may makita nga campaign materials sa mga government facilities kag equipments kaangay sang Barangay hall kag mga salakyan sang Barangay.
Pahanumdom ni Sorbito nga criminal in nature ang pagbayolar sa campaign regulations kag ang magalapas ang sarang mapriso, madisqualify kag mamultahan.
