Nagdangat sa 252 ka rolling cargoes ang narecord nga stranded sa bilog nga Coast Guard District Southern Visayas bangod sa kanselasyon sang sea trips matapos napaidalom sa Storm Signal No. 1 bangod sa Tropical Storm BASYANG.
Sa interview sang Bombo Radyo Bacolod kay Commander Artzell Anacan, commander sang Coast Guard Station Northern Negros Occidental, 11:00 kagab-i nagpagwa na sila sang advirories nga nagakanselar sang sea trips.
Sa bilog nga Southern Visayas, may 11 man ka vessels nga stranded, may 11 nga nagatake-shelter samtang nagadangat sa 759 ang nastranded nga pasahero.
Kalakip diri ang mga pasahero, drivers kag helpers.
Gikan diri, 490 ang stranded nga pasahero sa Negros Occidental sa record alas-12:00 kaina sang udto.
Paathag ni Anacan nga kun may storm signals sa port of origin kag port of destinations, automatic man nga kanselado ang byahe.
Lauman suno diri nga magalabay sa Negros Island Region ang Bagyo bwas.
Bilang preparasyon, ang PCG Northern Negros Occidental ang nagpadala naman sang personnel sa mga banwa kag ciudad nga wala sang Coast Guard.
Nagapadayun man ang ila nga coastal security patrol, kag mga pahanumdom sa mga mangingisda nga likawan ang magpalawod.
Nagakoordinar man sila sa mga Disaster Risk Reduction and Management Offices sa nagkalainlain nga banwa kag ciudad.
Sa tion nga mabatak na ang Storm Signal, mahimo naman nga makabalik ang byahe kun klaro naman ang tiyempo sa port of destination.
