Nagdangat sa kapin 100 ka pamilya ang apektado sa sunog nga nagluntad sa Endrina Street, Barangay 5, San Carlos City kagab-i.
Sa interview sang Bombo Radyo Bacolod kay Fire Officer 3 Joseph Earl Solivio, chief investigator sang Bureau of Fire Protection (BFP) – San Carlos, nabatun nila ang report alas-8:44 kagab-i, kag bangod yara lamang sa City proper ang ginluntaran sang sunog sila ang naka-abot wala pa isa ka minuto.
Apang pag-abot nila sa area tatlo tubtob apat ka balay na ang ginalamon sang kalayo.
Ini ang gindeklarar naman nga 3rd Alarm, bangod ang lugar ang ginabug-usan sang mga informal settlers kun sa diin naga-inikit ikit lamang kag footwalk lamang ang distansya samtang kadam-an ang human sa light materials nga madasig dakpon sang kalayo.
Sa karun gina-imbestigaran pa ang ginhalinan sang kalayo apang sa imbestigasyon ini ang nag-umpisa sa tunga nga bahin sang mga pamalay, rasun kun ngaa nadugayan ang pagpalong sang kalayo.
Ang sunog ang nafireout alas-10:27 kagab-i kun sa diin ang estimated damage ang yara sa P750,000.
Ang mga apektado nga residente ang temporaryo nga nagtinir sa gymnasium sang Barangay 4, nga yara lamang sa tabok sang dalan bangod magamay ang compound sang Barangay 5 agud magcater sang mga nasunugan.
Ginapakamaayo na lamang ni Sorillo nga wala sang may nasamaran sa nasambitan nga sunog.
Samtang, ginakabig nga pinakadako nga sunog sa ciudad sang San Carlos subong nga tuig ang nagluntad sa Endrina Street, Barangay 5, San Carlos City kagab-i kun sa diin nagdangat sa 104 ang balay nga nasunog.
Sa interview sang Bombo Radyo Bacolod kay San Carlos City Mayor Renato Gustilo, ang mga nasunugan ang ginhamtang nila sa covered court Barangay 4, nga yara lamang sa tabok sang dalan.
Pasalig sang alkalde nga kagab-i pa lamang ang ila nga City Social Welfare and Development (CSWD) Office personnel ang naga-assist na sa mga biktima kag ang una nila nga ginsalbar amo ang pagkaon sang mga nasunugan.
Nagapanawagan man ini sa may mga extra nga panapton kag willing nga magdonar nga ini ang sarang madul-ong sa CSWD office.
Paathag sini nga gin-una lamang nila ang pagcater sang makaon sang mga biktima, kag sa Lunes ila naman nga asikasuhon ang para sa financial assistance.
Paathag sang alkalde nga yara sa P5,000 tubtob P10,000 ang mabatun sang mga pamilya, apang ini ang magadepende pa sa assessment.
Nakadepende naman sa mga biktima, nga mga informal settlers kun sila ang liwat magatukod sang balay sa nasambitan nga lugar.
Aminado ang alkalde nga may mga sunog naman nga nagluntad sa lugar nga masami tuga sang kandila, bangod madamo sa ila ang wala sang kuryente.
Apang kahapon, siya ang nakabatun sang impormasyon nga ang sunog ang natuga sang kandila nga ginagamit sang mga nagahithit sang shabu.
Aminado man ang alkalde nga may mga reported drug activities sa lugar, apang ini ang magahulat gid gihapon sang opisyal nga resulta sang imbestigasyon.
