Gintalana ang duha ka lane sa dalan Bonifacio agud nga mabaligyaan sang mga vendors nga nasunugan gikan sa Bacolod Central Market kahapon sang kaagahon.
Sa interview sang Bombo Radyo Bacolod kay Councilor Celia Flor, chairperson sang Committee on Markets sa Sangguniang Panlungsod, gintsekyar kahapon ang nasunog nga bahin sang merkado.
Ini ang ginboard up ukon ginbutangan sang baral agud nga indi mahamper ang imbestigasyonkag makabalik sa pagbaligya ang mga section nga wala naulamid sa sunog.
Samtang ang mga vendors sa nasunog nga stalls ang ginpahanugutan naman nga makabaligya sa duha ka lane sang Bonifacio Street.
Naghatag naman sang instruction si Bacolod City Mayor Alfredo “Albee” Benitez sa City Engineer’s Office nga mabutangan sang temporary structure ang area kaangay sang canopy agud sila ang indi mabasa inkaso mag-ulan.
Sa pihak nga bahin, nagareklamo naman ang mga vendors sa sulod bangod sila ang wala sang magamit nga kuryente.
Paathag sang konsehal nga nagrekomendar ang Bureau of Fire Protection Regional Office 6 nga magpatigayon sang total rehabilitation sa electric line sa kabug-usan sang Bacolod Central Market.
Wala man ginarekomendar ang paggamit sang generator bangod indi pa estable ang linya.
Panugyan sini nga kun mahimo maggamit lamang anay sang mga rechargeable equipments para sa suga kag iban pa nga kinahanglan sa sulod sang merkado.
Aminado ini nga may initial plan na sa pagrehabilitate sang Bacolod Central Market.
Apang bangod ang Burgos Public Market ang pinakamagamay kag mahapos mapatuman, ini ang gintutukan sang ciudad apang wala man madayun matapos ginreject sang vendors.
Suno sa konsehal, kun nadayun ang sa Burgos Public Market, kuntani sunod-sunod na ang development.
Kun ini ang iduso, panugyan ni Flor nga una anay maghimo sang pirmado nga sulat gikan sa vendors.
Apang antes sini, pahanumdom sini nga ang dapat matutukan sa karun amo ang mapabalik ang negosyo ilabi na nga kinahanglan sang mga vendors sang kwarta subong nga paskwa.
Hatagan man sang assistance ang mga apektado nga vendors paagi sa Assistance to Individuals in Crisis Situation (AICS), nga bayad agad cash assistance.
