Wala na ginpilit pa sang isa ka lola nga kuahon ang ila gamit kag gin-una na lang nga salbaron ang mga apo sini.
Sa interview sang Bombo Radyo kay Nelly Datoon, nagdalagan ini pasulod sa ila lugar sang may nabatian ini nga may nagsinggit nga may yara sang sunog.
Suno diri, kuhaon kun tani sini ang papeles sang iya bata apang bangod nga wala na sang kuryente, madulom ang kwarto kag indi na ini makakita.
Ginhingagaw na lamang niya kuha ang duha niya ka apo kag gindala sa bakante nga lugar ang mga kabataan.
Suno kay Datoon, gin-una na lang gid sini ang iya mga apo nga mapalayo sa lugar bangod nakulbaan ini nga may maglupok nga mga gasul.
Samtang, wala na napunggan pa sang bata sini nga si Jean Datoon, nga miyembro sang drama production sang Bombo Radyo Bacolod, nga mangin emosyonal sang makita ang balay sini nga natupok sang kalayo. Samtang, wala gid sang may nasalbar nga gamit ang 68 anyos nga babayi nga nalakip sa mga nasunogan sa purok Magnolia, barangay 7, Bacolod City.
Sa interview sang Bombo Radyo kay Julia Flores, nagdali-dali ini dalagan papauli sang nakita ang kalayo kag madamol nga aso sa ila lugar.
Suno diri, nabatian sini nga nagasinggit na ang mga tawo nga may yara sang sunog kag nagadinaalagan salbar sang ila gamit kag pamilya.
Apang wala gid may nasalbar nga gamit si Flores nga bisan ang iya kwarta, cellphone kag bag nadala sa sunog.
Naghingagaw pa ini para salbaron ang iya ido apang wala na niya mahimo.
Pahayag sini ang may yara gid lamang siya sa karun amo ang bayo nga iya ginasuksuk humalin pa kahapon.
