Nakabatun na sang food packs kag inisyal nga financial assistance ang mga nahalitan sa nagluntad nga sunog sa Purok Sawmill, Barangay Bata sang Biyernes.
Madumduman nga anom ka pamalay ang totally damaged samtang isa naman ang partially damaged sa sunog nga may kabug-usan nga kahalitan nga nagdangat sa P225,000.
Suno kay Punong Barangay Angelito “Lito” Abaring, ginhatagan nila gilayon sang foodpacks kag financial assistance ang mga nasunugan.
Magluwas sa Barangay, nagpalab-ot man sang bulig ang Department Social Services and Development (DSSD) kag Bacolod City Disaster Risk Reduction and Management Office (CDRRMO).
Suno sa Punong Barangay, ginpapasa na nila sang mga papelis ang mga nasunugan kag nagpatigayon man sang sila sang special session agud nga patpatun ang mapalab-ot nga bulig agud mapadasig ang recovery sang mga nahalitan.
Bukas naman ang Barangay sa mga dugang nga donasyon para sa mga biktima sang sunog.
Sa karun, nagapuyo sa ila mga himata ang pila sa nadulaan sang pamalay samtang ang isa naman ka pamilya ang ginpatinir sa eskwelahan kun sa diin nagatrabaho ang isa sa nasunugan.
Nagpahanumdom man si Abaring sa mga pumuluyo nga indi pagbiyaan nga nakasaksak ang mga kuryente kun maghalin sa balay kag daman padayun nga mangin mahinalungon.
