“Magbulig sangsa magreklamo,” ini na lamang ang nakita nga paagi sang grupo sang mga negosyante agud bisan paano mapahagan-hagan ang power crisis.
Sa interview sang Bombo Radyo Bacolod kay Frank Carbon, chief executive officer sang Metro Bacolod Chamber of Commerce and Industry (MBCCI), tatlo ka bulan na sang magsugod ang yellow kag red alert sang National Grid Corporation of the Philippines (NGCP).
Nadesisyunan sang MBCCI nga imbes magreklamo, sila ang magabulig na lamang nga mabuhinan ang electric consumption.
Sa pagkooperar sang ila mga miyembro, ginalauman nila nga bisan paano mapanubo ang mga power interruption sa duha ukon isa ka oras lamang sangsa tatlo ka oras.
Suno kay Carbon, ang pinakadako nga konsumo sa kuryente ang kalabanan bangod sa airconditioning system, gani ginpanugyan nila nga imbes nga ibutang ang thermostat sa 16 ukon 17 degrees Celsius, ini ang ibutang na lamang sa 24 ukon 25 degrees.
Samtang isa man sa nakita nila nga paagi agud magdugay ang kabugnawon sang lugar, ang pagbutang sang air curtains sa mga bintana.
Ginpahayag man sang technician sa ila nga dapat may regular maintenance ukon cleaning sa airconditioning system, bangod sa isa ka bulan nga indi malimpyohan, nagadako man ang konsumo nga kuryente sang aircon.
Ginapatay man nila ang suga sa mga pasilidad nga wala ginagamit.
Samtang ginrekomendar man nila sa mga restaurant kag hotel nga kun mahimo sa adlaw na lamang tingubon ang pag-bake ukon bulk-baking, agud mabuhinan ang demand sa kuryente sa gab-i.
Suno diri, mas mahal ang bili sang kuryente sa Wholesale Electricity Spot Market (WESM) kun gab-i.
Samtang ginarekomendar man nila sa mga malls kag mga dalagko nga factory kaangay sang brewery companies nga maggamit sang generator sang duha tubtob tatlo ka oras kun gab-i.
Pahayag ni Carbon, nga mas dako pa ang gastos sa konsumo sa kuryente sangsa konsumo sa gatong, apisar nga nagmahal naman ang diesel.
Paathag ni Carbon nga kun magbuhin ang demand sa kuryente sa peak hours, partikular na sa alas-6:00 tubtob alas-9:00 sang gab-i, mahimo nga magnubo man ang ipatuman nga power interruptions.
