Gina-engganyo sang pinuno sang Business and Licensing Office sa syudad sang Bacolod ang mga negosyante nga magkuha na sang appointment sa karun sa pag-apply sang business permit agud mas mahapos nalang sa madason nga tuig bangud billing assessment kag payment nalang ang ila himuon kag makuha na gilayon ang ila business permit.
Sa interview sang Bombo Radyo kay Stela Rose Rayos, sa tanan nga may yara na sang 2020 Mayors Permit mahimo na sila makakuha sa opisina sini sang application form para sa 2021 kag makaumpisa na sila kuha sang mga clearances para sa madason nga tuig mahapos nalang ang ila pagkuha sang business permit.
Suno kay Rayos, sa tion nga mabayran na nila ang balayran nga full payment makakuha ang mga negosyante sang 10 percent nga discount sa business tax.
Ginapahanumdom man sini nga ang business permit renewal kag Business One Stop Shop ang extended kag magaumpisa sa January 4 tubtob March 31 2021 agud mahatagan sang tion ang mga tax payers agud nga makaproseso sang business permit.
Ginpahayag man sini nga ang pagposeso sang Business Permit ang by appointment.
Ginhimo man sang Business Permit and Licensing Office ang by appointment nga transaction agud malimitahan ang mga tawo bangud man sa ginapatuman nga minimum health protocols.
Aminado man ini nga nagnubo ang nagapply sang Business Permit bangud man sa ginapangatubang nga pandemiya apang nagalaom man si Rayos nga sa tion nga magbalik sa normal ang tanan madugangan ang naga-apply sang business permit.
