Wala nagakompormi ang chief executive officer sang Metro Bacolod Chamber of Commerce and Industry (MBCCI) sa ginaduso nga mga hagna tuhoy sa pagpasaka sang minimum wage.
Madumduman nga ginaduso sang Makabayan bloc kag Gabriela ang P750 nga minimum wage increase samtang nagfile man sang hagna si Senate President Juan Miguel Zubiri nga nagaduso sang minimum wage increase nga P150 sa private sector workers.
Sa interview sang Bombo Radyo kay Frank Carbon, ginpahayag sini nga daw kaangay nga ginatulod sa ila nga mga employers ang pagsolbar sang problema sang Pilipinas paagi sa pagpasaka sang sweldo.
Suno kay Carbon, indi ang manubo nga sweldo ang problema sang pungsod kundi ang kakulang sang trabaho kag mataas nga presyo sang pagkaon kag mga commodities.
Suno sa iya, indi lamang ini problema sa mga employers kundi sang bilog nga nasyon gani dapat reviewhon sang gobyerno ang mga layi agud magdamo ang investments sa pungsod nga magahimo sang madamo nga trabaho kag tinguhaan nga mapanubo ang presyo sang pagkaon.
Suno diri, indi dapat pag-ipasa sa ila ang solusyon bangud indi ang mga ini makasarang sang P150 nga increase ilabi na ang ginaduso nga P750 nga dugang sa minimum wage.
Dugang pa ni Carbon nga kun ini ang dayunon, madamo ang magasirado kag madulaan sang negosyo kag trabaho.
Nagapati ini nga indi ini ang nagakaigo nga tion para sa wage increase kag dapat nga ini ang tun-an sang Regional Wage Board.
Suhestiyon ni Carbon nga mag-invest ang gobyerno sa agriculture kag fisheries agud makaproduce sang madamo nga trabaho kag masolbar ang problema sang pungsod.
