Ginkalipay sang mga negosyante sa banwa sang Toboso, Negros Occidental ang ginpagwa nga Executive Order sang alkalde angot sa pagwaive sang renta sa mga ini sa merkado sang banwa.
Sa interview sang Bombo Radyo Bacolod kay Mayor Richard Jaojoco, ginhimo sini ang EO bangud nakita sini ang kabudlayan sang mga manugbaligya sang banwa sa sulod sang siyam ka bulan nga nagapangatubang sa pandemiya.
Suno kay Jaojoco, ang market day sang banwa ang isa ka kahigayunan nga makabawi ang mga negosyante gani ginmaspakamaayo sini nga iwaive lang anay sa sulod sang isa ka bulan ang pagbayad sang mga stall owners sa renta.
Samtang, ginpahayag man ni Jaojoco nga isa man sa tinutuyo sang Executive Order ang mapauntat ang korupsyon sa merkado bangud ginaimbestigaran pa sang talatapan sini ang nagakatabo nga pagpangtampered sang mga resibo sa ginakolekta nga tax.
Suno sa alkalde ginalantaw man sini nga magpabutang sang inspector kaangay sang ceres agud mahibaluan kun nagasulod sa kaban sang gobyerno ang ginakolekta nga buwis nagikan sa mga negosyante.
Nagpanawagan man ini sa mga pumuluyo nga mangin vigilante agud mauntat ang nagakatabo nga ginagmay nga korupsyon.
Suno pa diri, ang banwa nga ginapamunuan sini ang nalakip sa 3rd class Municipality kag nagadepende ini sa Internal revenue allotment (IRA) sang banwa.
Suno kay Jaojoco, kun mapadayon pa ang pagnubo sang IRA bangud sa wala nagakadto sa kaban ang gobyerno ang ginakolekta nga buwis wala na sang mangin pondo ang banwa.
Ginpahayag man sini nga nagsaka ang ginakolekta nga buwis sang banwa sang tinalikdan nga tuig apang sa karun ginalauman man sang Toboso LGU nga maganubo ini subong tuig bangud sa epekto sang pandemya.
Nagpanugyan man ang alkalde nga masami nga magsuksok sang facemask kag faceshield kag magobserbar sang health protocols sa tion nga maggwa sa balay.
