Mabatun na bwas sang mga Negrense medalist sa Palarong Pambansa 2024 ang cash incentives gikan sa Negros Occidental Provincial Government.
Sa interview sang Bombo Radyo Bacolod kay Negros Occidental Governor Eugenio Jose ‘Bong’ Lacson, P5,000 ang mabatun sang mga gold medalist, P4,000 para sa silver medalist samtang P3,000 naman ang ihatag sa bronze medalist.
Ini ang bilang pagkilala sa ila nga dungog nga nahatag sa probinsya bilang representante sang Western Visayas sa national sporting event.
Suno kay Lacson, ginabanta nagadangat sa P800,000 ang ila mapanagtag nga cash rewards.
Ang programa ang natalana nga patigayunon sa Negros Residences, bangod mahimo magatambong man ang mga ginikanan sang mga kabataan.
Madumduman nga nag-third place ang Western Visayas sa Palarong Pambansa 2024 matapos magtipon sang 56 ka gold; 41 ka silver kag 41 ka bronze medals.
Samtang isa lamang ka gold ang labaw ang Region 4A ukon Calabarzon nga nakakuha sang 57 gold; 41 silver kag 53 bronze medal.
Nangin overwhelming naman ang kadalag-an sang National Capital Region (NCR) nga naghakot sang 98 gold, 66 silver kag 74 bronze medals.
Suno kay Lacson, kun nadaog sang Western Visayas ang duha ka ulihi nga hampang sang football kag softball, namaintain kuntani sang Region 6 ang second place.
Apisar sini, pahayag sang gobernador nga magtinguha na lamang nga makabawi sa masunod nga Palarong Pambansa, kun sa diin ginalantaw nga kabahin na sang Negros Island Region ang probinsya.
Gindayaw man ni Lacson ang nangin performance sang Bacolod Tay Tung High School Volleyball Girls nga nakakuha na sang back-to-back championship
