Suno kay Alyas Bastian, 22-anyos pa lamang ini kag bag-o gid lamang graduate sa senior high school sang siya ang nagbakasyon sa iya tiyo sa ciudad sang Kabankalan.
Suno sa iya, ginasugo ini nga magdulong sang mga bugas, groceries kag supplies kag wala siya nakahibalo nga NPA gale ang nagabaton sini.
Isa ka adlaw, sang iya gindul-ong ang mag supplies, siya ang ginhawiran sang armado nga grupo kag wala na ginpabalik.
Sugod sadto, siya ang gintrain sa pag-uyat sang armas kag nangin platoon leader.
Suno diri, siya ang gin-assign nga magtrain sa mga menor-de-edad nga ginarecruit sang hublag kag wala nakahibalo ang iya mga ginikanan tuhoy diri.
Pagkatapos sang tatlo ka tuig, nagbalik ini sa sabak sang gobyerno bangud indi na sini mabatas ang pasaylo-saylo sang lugar, gutom kag kahangawa sa iya kabuhi.
Malipayon ini sa karun nga iya na liwat nga naistorya ang iya pamilya kag nakahalin na sa grupo.
Nagpanugyan man ini sa iya mga kaupdanan nga magbalik naman sa gobyerno bangud indi matuod nga sila ang sakiton sang militar kun sila ang magsungka.
Luyag naman ni Alyas Pepe nga makaupod liwat ang iya pamilya rason kun ngaa nagbalik na ini sa sabak sang gobyerno.
Si Alyas Pepe, nga residente sang Ayungon, Negros Oriental, ang apat ka tuig nga nangin rebelde kag kaupod sini ang iya bata nga lalaki nga nabilin sa hublag.
Suno diri, wala sila nakaistoryahanay sang iya nga bata bangud siya ang Team 3 samtang Team 1 naman ang iya bata kag layo ang ila position sa isa kag isa.
Siya ang may lima ka mga kabataan kag sang nahibaluan sang iya asawa nga magasulod ini sa grupo, wala na ini sang may nahimo.
Suno sa iya, nagsurrender ini bangud luyag niya nga makaupod ang iya pamilya kag nakit-an sini nga nagbalik naman sa sabak sang gobyerno ang nagrecruit sa iya.
Suno diri, sadto, isa ini sa mga nagaistorya kag naga-engganyo sa mga pumuluyo nga makigbahin sa NPA.
Ginpakigbahin sini ang iya mabudlay nga eksperyensya kun sa diin indi sila makatig-ang kag makakaon kun yara ang presensya sang mga militar kag ila ginabatas ang gutom.
Indi man madula ang kakulba sa iya panghuna-huna kag kasing-kasing nga basi ini ang maigo sang bala kag mapatay sa engkwentro.
Suno diri, sa apat ka tuig sini sa hublag, wala gid ini sang may nakuha kundi kamingaw lamang sa iya pamilya gani handom sini nga sila ang iya na makaupod kag makapangabuhi sang normal.
