Nagalaom ang mga overseas Filipino workers nga mahitso sang Overseas Workers Welfare Administration ang sistema sang repatriation padulong sa Bacolod kag probinsya sang Negros Occidental agud indi na maeksperyensyahan sang masunod nga batch ang kabudlay nga ila naagyan antes napahamtang sa quarantine facility.
Si Benz sang Silay City, Negros Occidental ang kabahin sang una nga batch sang mga OFWs nga nagpauli sang Sabado sang gab-i apang bangud wala sang bakante nga hotel room, masobra pa 12 oras ang ila ginhulat.
Sa interview sang Bombo Radyo kay Benz, masobra lima ka oras ang ila tinir sa Bacolod-Silay Airport antes ginsugat sang bus kag gindul-ong sa Acacia Hotel sa Reclamation Area sa syudad sang Bacolod.
Suno diri, alas 10:30 sang gab-i sang Agosto 22 sila sang nag-abot apang alas 3:00 na sang kaagahon sila nasugat kag nadala sa hotel apang wala man mabakante.
Suno diri, ang iban ang nagtulog nalang sa higad sang pool, ang iban nagpungko sa shed kag ang iban ang nagginutok sa function hall.
Wala man sang representative ang Overseas Workers Welfare Administration (OWWA) nga nag-atubang sa ila agud mapaathagan sila kun ngaa wala sang maaccommodate sa ila nga hotel.
Sang yara sila sa Manila, aminado si Bez nga wala man sila sang problema bangud gin-assist sila sang maayo nga baliskad sa ila nga pag-abot diri sa Bacolod.
Alas-11:00 na kahapon sang udto sang ginsugat sila sa Acacia Hotel agud sayluhon sa Westown Hotel.
Nagpanawagan si Benz nga dapat may yara sang koordinasyon ang OWWA national office kag regional office agud malikawan ang kaangay nga problema kun sa diin sarang sila nga malatan sang virus.
Suno pa diri, wala man naobserve ang social ukon physical distancing sa sulod sang eroplano.
Ang ulihi nga batch sang mga OFWs nga nag-istambay sa reclamation area ang ginsugat sang ila tagsa ka LGU tubtub kagab-i.
