Nakapauli na ang 36 ka mga repatriated Negrenses kag isa ka bata sang tinalikdan nga Sabado kag Domingo sang kaagahon.
Sa impormasyon nga nakuha sang Bombo Radyo, nag-abot sang Sabado sang kaagahon ang 21 kaupod ang isa ka bata sakay sa sweeper flight sa Air Asia.
Samtang nag-abot naman ang 14 sang Domingo sang kaagahon sakay sa Philippine Airlines.
Lunsay nga gin-assist ang mga ini sang Provincial Incident Management Team kag gindala sa EB Magalona healing center para sa swab testing.
Sa karun, may yara na sang kabug-usan nga 856 ka mga repatriated OFWs kag Locally Stranded Individuals ang nagatinir sa mga quarantine facilities.
Ini ang ginalakipan sang 183 sa EB Magalona, 77 Mambukal sa, 53 sa Go Hotel, 140 sa Limmans Center Inn, 18 sa Northwest Inn, 38 sa Westtown, 71 sa Cadiz, 110 sa Kundutel, lima sa Circle Inn, 63 sa Negrense Suites, 24 sa Carribean, 27 sa Eastway Inn, 25 sa Star Plus Pension kag 22 sa Real Suite.
Samtang may duha man ka barko nga ginahulat nga maga-abot subong nga adlaw nga ginalakipan sang St. Therese and Child Jesus kag St. Leo the Great.
Apang suno kay PDMP Head Dr. Zeaphard Gerhart Caelian, wala sang nahatag kun pila ang maabot bangud ang manifesto ang ginahatag lang sa tion nga nakasakay na ang mga ini kag padayon sa gihapon nga problema ang koordinasyon sang OWWA sa national government sa LGU sang probinsya angot sa mga manugpauli nga repatriates kag LSI gani ang probinsya ang nagpreparar nalang sang madamo nga quarantine centers.
Ipaidalom man sa swab test ang mga ini bangud nagikan ang mga ini sa highly infected areas.
Samtang nag-abot naman sa Bacolod ang 102 ka mga Locally Stranded Individuals nagikan sa Manila sakay sa Philippine Airlines flight PR 4135.
Gindala naman ang mga ini sa ETCS 4 agud mapaidalom sa 14 day mandatory quarantine.
Apang suno kay Councilor Cindy Rojas, chairman sang committee on returning residents, may onse diri nga naghotel apang personal nga gasto sang mga ini.
May ginapaabot man ini nga 70 nga mapauli subong nga semana sa ciudad nga nagikan sa Cebu.
May yara naman san ginhanda nga duha ka eskwelahan para sa mga LSIs.
Ini ang ginalakipan sang Bacolod City National High School kag Alfredo M. Montelibano Sr. Elementary School.
May yara naman sang proper coordination sa tunga sang LGU nga ginhalinan sang mga ini kag syudad.
