Magapabilin nga bukas kag padayon nga magaserbisyo ang mga talatapan sa Bacolod City Government Center sa pihak sang patigayunon nga transport strike nga ginatawag “People’s Holiday”, sa Lunes kag Martes, Marso 21 tubtub 22.
Sa interview sang Bombo Radyo kay Bacolod City Administrator Atty. Edward Joseph Cuansing, santo sa statement ni Bacolod City Mayor Evelio “Bing” Leonardia, mangin “business as usual” ang city hall sa sulod sang duha ka adlaw nga peoples holiday.
Suno kay Cuansing, nahangpan sang alkalde ang sentimyento kag pagka-dismaya sang transport groups sa tunga sang asud-asod nga pagsaka sang presyo sang gatong kag nagaupod man ini sa pagpanawagan sa mga ahensiya sang gobyerno sa pagpahagan-hagan sang mabudlay nga sitwasyon nga mas ginpalala pa sang health crisis.
Suno sa City Administrator sa syudad sang Bacolod nga ginafinalize na sa karun sang Bacolod Traffic Authority Office (BTAO) ang pick-up points para sa patigayunon nga Libre Sakay sang syudad sa mga empleyado sang city government.
Ginpahayag ni Cuansing nga gamiton ang bus kag ang salakyan sang syudad para sa libre sakay.
Ginaengganyo man sang city administrator ang mga empleyado nga magmotor pooling.
Ginpahayag man sini nga may yara man sang iban nga magabiyahe bangud indi man tanan ang makigbahin sang untat-biyahe bangud indi man ang tanan nga driver ang makasustiner nga indi magbiyahe sa sulod sang duha ka adlaw.
Sa pihak nga bahin, hulaton nalang sang syudad sang Bacolod ang opisyal nga desisyon sang presidente angot sa ginaduso sang National Economic and Development Authority (NEDA) nga 4-day work week antes magdesisyon ang alkalde sang syudad angot diri.
