Nagalaom ang mga opisyales sa Negros Oriental nga makagwa na ang resolusyon sang Department of Justice angot sa complaint nga ginpasaka batok sa Degamo assassins antes makadesisyon ang Commission on Elections kun dayunon ukon ipostpone ang Barangay and SK Elections sa probinsya.
Sa interview sang Bombo Radyo Bacolod kay Dumaguete City Mayor Felipe Antonio Remollo, natapos na ang hearing sang Comelec may kaangtanan sa ginaduso nga pag-isol sang Barangay kag SK Elections sa probinsya.
Bangud sini, ang mga datos kag position paper nga natipon sang Comelec ang ila pagabasehan para sa pagdesisyon kun dayunon ang eleksyon ukon indi.
Indi pa sigurado si Remollo kun magapatawag pa ang Comelec sang formal hearing sa central office apang nabatian sini kay Chairman George Garcia nga kun October 30 ang schedule sang eleksyon, sa Setyembre magapagwa sang resolusyon ang Comelec en banc kun ipostpone ang Barangay and SK elections sa Negros Oriental ukon indi.
Wala naman sang dugang nga gasto ang poll body kun iisol ang eleksyon sa Negros Oriental.
Suno kay Remollo, respetuhon nila ang mangin desisyon sang Comelec.
Suno sa iya, indi lang sila nga mga alkalde ang nagakahangawa nga wala pa nagbalik sa normal ang sitwasyon sa probinsya kundi pati ang mga pumuluyo, kasunod sang Degamo assassination.
Nagalaom naman ini nga magagwa na ang resolusyon sang Department of Justice angot sa mga kaso sang mga ginpatay sa Negros Oriental agud nga mahibaluan ang reaksyon sang mga pumuluyo kag matumod kun dayunon ang eleksyon ukon indi.
Ini bangud nga masubuan ang kampo sang mga biktima kun ma-exonerate ang mga akusado samtang may malipay naman sila ang incarcerated.
