Nagalaom man ang mga barangay officials sang Barangay 19-A sa ciudad sang Victorias nga masolbar sang mga kapulisan ang shooting incident nga nagluntad sa ila lugar.
Madumduman nga antes ginpatay si Danilo Toreña sa Angeles Street, Canetown Subdivision Phase 2 kaina sang aga, isa man ka lalaki nga gin-utdan sang dulunggan ang ginhal-id sa Canetown Subdivision kag tubtub sa karon, wala man sang suspetsado sa krimen.
Sa interview sang Bombo Radyo Bacolod kay Barangay Kagawad Rabbie Sombero, nakibot ini sang nagpahibalo ang barangay tanod nga gintiro sang motorcycle riding suspects si Toreña.
Suno kay Sombero, indi niya personal nga kilala si Toreña apang santo sa nakita sini, wala man sang gamo kag wala man sang malain nga rekord sa barangay ang biktima.
Ginpahayag man sini nga pagadugangan pa ang mga nagaroving sa barangay apisar nga may yara na sang nagalibot kada gab-i agud magpabilin sang peace and order.
Nagpanugyan man ini sa mga pumuluyo nga maghalong.
Wala man sang CCTV sa crime scene bangud ang CCTV sang barangay ang yara napahamtang sa highway.
Ginpasalamatan sang kagawad ang mga kapulisan sa madasig nga pagresponde apang nagpangayo ini sang bulig nga mahatagan sang solusyon ang natabo nga shooting incident sa barangay.
