Aminado ang punong barangay sang Banago diri sa ciudad sang Bacolod nga ang dalagko nga mga truck nga nagapark sa higad sang circumferential road ang dako nila nga problema subong nga nagresume na ang road clearing operations.
Sa interview sang Bombo Radyo kay Punong Barangay Ricky Mijares, nagahalin ang dalagko nga truck kun sawayon nila ang driver apang nagapark naman ang iban kun wala sang presensya sang barangay officials.
Suno kay Mijares, yara sa lebel sang Bacolod Traffic Authority Office ang pagsaway sa driver sang mga truck bangud may puder sila nga maghatag sang citation ticket.
Wala naman sang problema ang mga barangay officials sang Banago sa mga vendors ilabi na sa Purok Puno.
Antes pa man ang pagresume sang clearing sang Nobyembre 16 suno kay Mijares, gin-istorya na niya ang apektado nga mga vendors gani wala na sila nagreklamo sang Lunes bangud napaathagan na sang mandu sang Department of the Interior and Local Government tuhoy sa pagresume sang clearing.
Gin-ayo naman ni Mijares ang tag-iya sang pribado nga merkado nga ginsayluhan sang mga vegetable kag fish vendors nga indi lang anay magsukot sang renta para sa bulan sang Nobyembre sa mga vendors nga wala sang baligya kag nagpasugot man ini.
Naghingyo naman si Mijares sa mga residente nga istoryahan nila ang problema kun may yara gid man agud wala sang madamo nga gamo may kaangtanan sa road clearing.
