Naghatag sang mensahe ang alkalde sang Bacolod kadungan sang pagselebrar sang ika-125 nga anibersaryo sang kahilwayan sang pungsod sa tema nga “Kalayaan, Kinabukasan, Kasaysayan”.
Suno kay Bacolod City Mayor Alfredo Benitez, may matahum nga bwas damlag ang Bacolod, kag ini isa ka destinasyon nga mabatyagan sang tanan.
Suno diri, halos adlaw-adlaw nila nga ginatun-an kun diin ang direksyon sang Bacolod kag indi ini mahapos gani kinahanglan sini ang bulig sang mga beterano para sa bwas damlag sang mga kabataan.
Dugang pa niya, magaabot ang tiyempo nga ang kada-isa makahambal nga sila ang nangin instrumento sa pagbag-o sang ciudad padulong sa destinasyon nga sang nakaligad ginaagyan pa lang apang sa karun nahuman na.
Luyag sini nga ipakita sa pumuluyo ang direksyon kag destinasyon sang Bacolod agud tanan magkaupod nga magpadulong didto.
Samtang kahilwayan sa kapigaduhon naman ang ginaduso ni Bacolod City Vice Mayor El Cid Familiaran.
Suno diri, pinakadako nga pagpanghakat sa gobyerno amo ang freedom from poverty, gani nagapangabay ini nga ini ang focusan bisan ini pa suguran lang kuntani sa food security kun sa diin ang tanan sarang nga makakaon sang tatlo ka beses sa isa ka adlaw. SAMTANG…Nagtambong man si Police Col. Noel Alino, acting city director sang Bacolod City Police Office sa programa nga ginpatigayon sa Bacolod City Public Plaza angot sa 125th Independence Day sang Pilipinas.
Suno kay Alino, nakit-an ang pagparticipate sang tagsa-tagsa ka ahensya sang gobyerno lakip na sang iban nga sektor.
Bangud sini, nagpasalamat ang acting city director sa mga taga-Bacolod sa kooperasyon agud nga mapanubo ang numero sang krimen bangud indi man ini mahimo sang kapulisan kun wala sang bulig sang mga pumuluyo.
Naghatag pa ini sang iya nga personal number nga matawagan sang sin-o man nga nagakinahanglan sang police assistance.
Suno diri, magtawag ukon magtext lamang sa 0969 573 7167 para sa anuman nga impormasyon ukon ginakinahanglan nga police assistance.
Suno naman kay Bacolod City Lone District Congressman Greg Gasataya, ginadumdom subong nga adlaw ang mga sakripisyo sang aton mga ancestors nga nagtaya sang ila kabuhi agud nga aton maaguman ang kahilwayan.
Nagalaom naman si Gasataya nga indi mauyang ang sakripisyo sang mga ancestors gani mas maayo nga nagahugpong ang mga Pilipino.
Suno kay 303rd Infantry Brigade commander Brigadier General Orlando Edralin, sa pihak sang bilog nga pwersa sang Philippine Army, nagaupod ang mga suldado sa pagselebrar sang kahilwayan sang Pilipinas.
Suno diri, himuon sang mga suldado ang tanan nga masarangan agud nga mapangapinan ang kahilwayan sang pungsod.
