Nagkasugot na ang mga opisyales sang Negros Occidental, Negros Oriental kag Siquijor nga sundon na lamang ang arrangement sa nakaligad nga Negros Island Region (NIR) sa pagpahamtang sang mga regional offices.
Nahibaluan nga pagsinapol ang gintambungan man ni Senate President Juan Miguel Zubiri kag Senator JV Ejercito.
Sa interview sang Bombo Radyo Bacolod kay Negros Occidental Governor Eugenio Jose “Bong” Lacson, amat amat na nga nagasanag ang posibilidad sa liwat nga pagtukod sang NIR.
Madumduman nga natukod na sadtong 2015 tubtob 2017 ang NIR pinaagi sa resolusyon apang gindissolve ni former President Rodrigo Duterte.
Sa karun, ini ang ginaduso naman nga liwat tukuron pinaagi na sa pagpasar bilang layi.
Sa pagsugilano nila ni Negros Oriental Governor Chaco Sagarbarria, ginkasugtan nila nga kun ano ang plastada sang paghamtang sang Regional Officer nakaligad nga NIR, amo na lamang ang ila nga sundon.
Apang indi pa nila maseguro kun may-ara sang opisina nga igasaylo sa Siquijor.
Kaangay na lamang sa Tourism Office nga ginalantaw nga mapabilin sa Negros Occidental samtang ang National Electrification Administration (NEA) kag Department of Agrarian Reform (DAR) ang didto naman sa Negros Oriental.
Suhestyon naman ni Subere nga himuon nga phase by phase ang implementasyon tubtob nga makumpleto ang tanan nga opisina.
Confident si Subere kaupod kay Ejercito nga ila na mapasar sa Desyembre ang hagna, agud magserbe nga Christmas gift sa Negros Occidental, Negros Oriental kag Siquijor.
Apang paathag sang mga Senador nga indi pa gilayon mapasar bilang layi ang hagna bangod ini ang magalabay pa sa opisina sang Presidente.
