Nagpanawagan ang mga opisyales sang Philippine Red Cross – Negros Occidental chapter sa mga luyag magdonar sang dugo sa palaabuton nga “Dugong Bombo: a little pain, a life to gain” blood letting activity sang Bombo Radyo kag Star FM sa maabot nga Nobyembre 18, 2023.
Nahibaluan nga tuigan na nga serbisyo sang tanan nga Bombo Radyo kag Star FM stations nationwide nang dululungan nga pagpatigayon sang blood letting activities in coordination sa Philippine Red Cross.
Pasalig ni Vina Jane Montero, donor recruitment officer sa PRC-Negros Occidental, todo na ang ila nga preparasyon sa Dugong Bombo nga patigayunon sa City Mall Mandalagan sa Nobyembre 18 halin alas-8:00 sa aga tubtob alas-5:00 sa hapon.
Paathag sini nga sini nga mga binulan ang ginatawag lean season kag Oktobre pa lamang, aminado na sila nga ninit na lamang ang nabilin nga supply sang dugo sa probinsya.
Bangod sini, sila ang nagatinguha nga makatap sa mga non-government organizations sa pagpatigayon sang blood letting activities agud madugangan sang pondo para sa panginahanglanon sang pumuluyo.
Panindugan ni Montero nga indi lamang pumuluyo sa Negros Occidental ang masalbar sang igadonar nga dugo, bangod kun nagakinahanglan sang supply sa kaingod nga probinsya sila ang makarequest man sang supply.
Aminado man ini nga ang Blood type AB ang pinaka-iwat nga dugo kun sa diin sa kada blood letting activity, kun kaisa tubtob lamang sa 10 ka bags ang ila nga matipon, samtang halos 200 ka bags naman ang ginakinahanglan sang mga pasyente kada adlaw.
Panawagan lamang ni Montero sa mga luyag magdonar sang dugo nga ipreparar na ang lawas agud mangin kwalipikado.
Samtang gin-athag naman ni Francis Bernard Guancia, quality assurance officer sang PRC-Negros Occidental, nga tuman ka importante ang dugo sa kabuhi sang tawo.
Pahanumdom sini nga magluwas sa makasalbar sang kabuhi, ang pagdonar sang dugo ang may benepisyo man sa lawas bangod ini nagabulig sa pagreplenish sang atun dugo bangod 120 dias lamang ang lifespan sang dugo sa lawas.
Ini nagabulig man sa pagregulate sang blood pressure nga maayo para sa mga masami nagataas ang dugo.
Bangod sa madamo sang pasyente sa nanarisari nga balatian ang nagakinahanglan sini kada adlaw, gani ginapasanyog man nila ang mga blood letting activities.
Ang magadonar ang magalabay sa screening kaangay sa interview, pagkuha sang vital signs kag clearance gikan sa physician.
Kinahanglan man nga may atleast 6 hours nga tulog kag masobra sa 50 kilo ang kabug-atun.
