Nagsumpa na sa atubang ni Negros Occidental Governor Eugenio Jose “Bong” Lacson sa social hall sang Provincial Capitol kahapon ang mga bag-o nga Sangguniang Kabataan Federation Provincial Level.
Na-elect bilang unopposed nga bag-o nga Presidente sa SK Federation sa Negros Occidental si San Carlos City SK Federation President Mayvelyn Madrid, 22 anyos, residente sa Barangay 5, San Carlos City.
Si Madrid ang graduate sa Central Philippines State University (CPSU) – San Carlos sa kurso nga Bachelor of Science in Agricultural Business.
Bilang panibag-o nga SK Federation Provincial Level President, siya ang magarepresentar bilang ex-officio Board Member sa probinsya sang Negros Occidental nga mangin tiglawas sang mga kabahin sa Sangguniang Kabataan sa probinsya.
Ginbuslan sini si anay SK Federation Provincial Level President Pocholo Yuvienco, nga tumandok man sang San Carlos City.
Sa pihak nga bahin, napilian naman bilang Vice President si Trisha Mae Majan; Secretary si Remar Lascano; Treasurer si Cheska Gwenyth Lopez; Auditor si John Mil Acerada; PRO si Kierly Villanueva; kag Sergeant at Arms nga sanday Gemnell Verzosa kag Steven Mellama.
Sa interview sang Bombo Radyo Bacolod kay Madrid, ginpasalig ini nga iya ang magahuman sang maayo nga relasyon sa iya nga mga kaupdanan agud maseguro sini nga iya epektibo nga mahugpong ang SK Federation sa probinsya.
Tinguhaan man sini nga sa pagbuligay ang mga SK officials gikan sa 31 ka mga ciudad kag banwa, mapatuman nila ang plano nga Free Printing para sa mga estudyante.
Aminado si Madrid nga kun ano ka dako ang posisyon nga ginapanguyatan, amo man nga nagadako ang responsibilidad.
Ginpasalig sini nga tinguhaan niya nga mapadayun ang mga nasuguran na nga programa ni Yuvienco kag magadugang pa sang mga panibag-o nga mga programa nga makapasanyog kag makahatag kaayuhan sa mga kabataan sa Negros Occidental.
