Nagatanyag ang mga opisyales sang Tahara City sa Japan sa mga opisyales sang ciudad sang Bacolod nga magdihon sang sisterhood agreement sa tunga sang duha ka ciudad.
Suno kay Bacolod City Mayor Alfredo Benitez, nagbisiya ang mga opisyales sang Tahara sa ciudad kag nagtanyag nga mangin sister city sang Bacolod.
Ang Tahara ang hometown sang car company nga Lexus gani nagapangita sila sang dugang nga tawo.
60,000 nalang ang population sang bilog nga ciudad kag kalabanan ang nagatrabaho sa pabrika sang salakyan samtang ang iban ang tigulang na.
Nagatanyag man sila sang employment sa patag sang caregiving, agriculture kag driving paagi sa exchange program sang Tahara City, apang antes sini, dapat makahibalo maghambal sang Nihongo ang mga Bacolodnon antes magpadulong sa Japan.
Nahibaluan nga ang Japan ang wala naga-hire sang manpower nga indi makahibalo sang ila nga local dialect.
Sa karon, mas madamo ang senior citizens sa Tahara gani nagakinahanglan sila sang mas huben nga manpower para sa ila nga mga pabrika.
Suno naman kay Frances Mae Llamas, local economic development and investment promotion head sang Bacolod, isa sa mga options para sa collaboration amo ang pagpasanyog sang bio-ethanol production kaupod ang kompaniya nga nabase sa Tahara.
Isa man diri ang pineapple kag cassava plantation gani magacollaborate sila sa mga LGUs nga makabulig sa plantation side agud nga makasupply sang kinahanglanon sang pineapple kag bio-ethanol plants.
Ginalantaw man ang partnership sa human resource engagement kun sa diin magabuligay para sa health and allied areas, driving kag specified skill workers set.
Suno kay Llamas, unahon ang pagdevelop sang Nihongo classes agud nga may yara sang technical skills kag soft skills ang mga igadeploysa Tahara City, Japan.
