Indi lang Corazon Locsin Montelibano Memorial Regional Hospital ang puno na ang bed capacity sa ciudad sang Bacolod, kundi subong man ang mga pribado nga ospital sang ciudad.
Suno kay Dra. Rommela Tiples Ruiz, Infectious Disease Consultant sang ciudad sang Bacolod, tanan nga mga pribado nga ospital sa Bacolod ang lunsay puno na ang bed capacity.
Dugang pa sini nga kun may-ara man sang bakante nga wards ukon segments sang ospital, wala naman sang may maibutang nga nurses.
Paathag ni Ruiz nga indi pwede magbatun sang pasyente ang ospital kun indi man nila matatap.
Suno diri, responsibilidad na sang ospital ang mga gina-admit nga pasyente agud ila nga bunglon, gani dako nga problema kun magabaton sila sang pasyente nga indi man nila ma-monitor.
Suno sa consultant, may plano naman nga magapatigayon sang home care services sa pagpamuno sang local government unit (LGU).
Nagahingyo man ang ciudad sa mga ospital nga magfacilitate sang home care service para sa mga COVID-19 positive patients.
Nagapati si Ruiz nga makabulig ini sa karun nga sitwasyon.
Suno diri, apisar nga wala sa ospital, kun nagahulat pa nga ma-admit ukon okay na nga yara lang sa balay, mahemo naman nga maasikaso kag mabantayan ang sitwasyon sang pasyente.
Pinaagi sini malikawan nga magdangat sa severe ang kaso.
