Wala sang may narekord nga ano man nga mga insidente sa probinsya sang Negros Occidental nahanungod sa Bagyo Ursula.
Sa interview sang Bombo Radyo Bacolod kay Provincial Disaster Management Program Division head Dr. Zephard Gerhart Caelian, ginkumpirmar sini nga may yara sang mga minor accidents nga natabo apang wala ini sang kaangtanan sa bagyo.
Nagapasalamat si Caelian kay acting governor Jeffrey Ferrer sa pagkonsiderar kag pag-aprubar sa tanan nga rekomendasyon sang PDMPD.
Madumduman nga sang Disyembre 23, ginpaidalom sa blue alert status ang probinsya samtang Disyembre 24 ginpasaka ini sa red alert status.
Ginpaidalom man sa white alert status ang mga district hospitals kag provincial health office.
Nagapasalamat man siya sa tanan nga mga disaster risk reduction and management offices (DRRMO) nga apisar Paskwa, nag-duty sa gihapon ang tanan nga mga personnel.
Suno kay Caelian, mas maayo na nga naka-preparar agud mapunggan ang ano man nga posible matabo.
Nagapasalamat man ini sa pumuluyo sa wala untat nga pagpangamuyo agud mapalayo sa katalagman ang probinsya.
