Nagapati si Bacolod City Vice Mayor El Cid Familiaran, pinuno sang inter-agency task force against COVID-19 sa Bacolod, nga ang pagpaidalom sang ciudad sa modified enhanced community quarantine (MECQ) ang bangud sa tuman kadamo nga mga salawayon sa Bacolod.
Suno sa bise-alkalde, tuman ka taas ang kaso sang COVID sa ciudad, ilabi na ang local transmission bangud sa pagkasalawayon sang mga pumuluyo.
Sa idalum sang MECQ, ginadumilian ang paggwa sang mga pumuluyo magluwas lang sa mga frontliners kag ang bisan ano nga sahi sang pagtililipon.
Ginapahanugutan naman ang pag-operate sang pila ka mga establisyimento kag opisina apang skeletal workforce lang.
Sarang man nga maka-operate ang mga establisyimento nga nagahatag sang essential goods kag services nga ginalakipan sang public markets; supermarket; grocery stores; convenience stores; laundry shops; mga kalan-an apang kinahanglan nga take-out ukon for delivery lang; water refilling station; mga ospital; medical, dental kag optometry clinics; pharmacies; kag drug stores.
Maka-operate naman sang full capacity ang mga media establishments; mga nagahimo sang semento kag steel; mga BPO companies; mining kag quarrying; e-commerce companie; postal, courier kag mga delivery services; rental; employment activities nga naga-involve sang recruitment para sa mga ginapahanugutan nga mga sector; mga nagapangay-o sang computers, personal kag household goods; kag mga housing services activities.
Wala man sang pampubliko nga transportasyon sa idalum sang MECQ.
