May pahanumdom ang tagpamaba sa Department of Education division of Negros Occidental sa pagpatigayon sang Christmas Party sang tagsa ka buluthuan.
Sa interview sang Bombo Radyo Bacolod kay Ian Arnold Arnaez, public information officer sang DepEd Negros Occidental, nagpagwa sang memorandum ang DepEd nga liwat nagapatuman sang 2022 Christmas Party guidelines.
Ini bilang sabat sa statement sang Malacañang nga nagapanawagan sa tanan nga government offices nga magpatigayon lamang sang simple nga Christmas celeberation bilang simpatya sa mga nahalitan sang naglabay nga bagyo.
Paathag ni Arnaez, nga sadto paman, gina-emphasize na sang DepEd ang pagpatigayon sang simple and meaningful Christmas celebration.
Kun sa diin ginadumili ang mandatory contributions ukon alamutan, sa baylo ang amot ang dapat boluntaryo lamang kag wala sang pilitay.
Dapat man nga mangin inclusive ang aktibidad kag pahanugutan nga makapartisipar bisan ang mga wala sang contribution.
Suno kay Arnaez, ang last day sang klase antes ang Holiday break ang tubtob lamang sa Disyembre 20 gani ginalantaw sini nga kalabanan ang magapatigayon sang Christmas Party Disyembre 19 ukon 20.
Apisar nga Disyembre 17 tubtob 20 man ang Division Meet sang Negros Occidental, ini ang indi man makaapekto bangod dyutay lamang ang mga atleta.
Dugang pa sini nga wala man ginapahanugutan ang pagpatigayon sang selebrasyon sa gwa sang buluthuan samtang ginapanugyan man nga kun mahimo irecycle na lamang ang mga christmas decoration sang tinalikdan, agud indi na madugangan pa ang galastusan.
Magluwas diri, ginapahanumdom man nga ang Christmas Party celebrations ang ginapahanugutan lamang sa class hours kag indi na pwede nga maglab-ot pa sa gab-i.
