Kapin 50 ka mga pamilya sa Barangay 12 ang inisyal nga maapektuhan sang renovation sang Manokan Country kag tupad nga mga lugar apang isipon pa ang final nga numero sang mga ini.
Suno kay Bacolod City Mayor Alfredo Benitez, istoryahon pa ang natungdan nga mga pamilya agud nga maisip kun pila ang apektado.
Suno sa alkalde, sapulon sang Bacolod Housing Authority ang apektado nga mga pamilya agud mapamatian kun ano pa gid ang iban nila nga concerns.
Suno kay Benitez, indi pa mapahalin sa lugar ang apektado nga mga pamilya subong nga tuig, apang magadepende ini sa SM Prime Holdings kun san-o nila suguran ang trabaho.
Sa tion nga maisip ang mga pamilya nga apektado, diri na magadesisyon ang city government kun sa diin sila isaylo.
Nahibaluan nga pirmado na ang kasugtanan sa tunga sang SM Prime Holdings kag sang city government angot sa renovation kun sa diin may patindugon man nga business process outsourcing building sa tupad sang mall sa reclamation area.
Pila naman ka mga pamilya nga maapektuhan sang renovation ang nagpahayag sa Bombo News Team nga naawardan na sila sadto sang lote sa relocation site sa Abada Escay sa Barangay Vista Alegre apang mas ginpili sang mga ini nga magbalik sa Barangay 12 bangud diri ang ila palangabuhian.
