Gintagtagan sang food packs ang mga pamilya nga nag-evacuate sa nagkalain-lain nga bahin sang Bacolod kadungan sang pagbaha sa ciudad kahapon.
Suno kay Dr. Anna Maria Laarni Pornan, pinuno sang City Disaster Risk Reduction and Management Office, ang food pack ang nagaunod sang tatlo ukon lima ka kilo nga bugas, canned goods, energy drink kag kape, samtang ginpaiway naman ang paglakip diri sang noodles.
Ang mga evacuees ang ginalakipan sang 1,322 families ukon 4,520 individuals nga nagatinir sa karon sa 24 ka evacuation centers sa 18 ka barangay.
Ang ginkabig nga critical areas kaina sang aga amo ang Cabalagnan River kag Alijis River samtang ginbantayan man ang Murcia kag Salvador Benedicto bangud mahimo nga madamol ang ulan sa duha ka banwa.
Ginmonitor man ang mga pamalay sa higad sang suba bangud sa rain-induced landslides kasunod sang tayuyon nga pag-ulan bangud mahimo nga naghumok na ang duta.
Suno kay Pornan, ang nagtuga sang baha kahapon amo ang Lupit River kag Sum-ag River.
Ginhitso man ang kinahanglan sang mga evacuees kaangay sang habol para sa mga tigulang, samtang nagpadala man sang folding beds sa mga evacuation centers.
Nagpanugyan naman si Pornan sa mga residente nga wala pa naka-evacuate nga magbantay sa palibot bangud mahimo nga magsaka ang tubig kun sige-sige ang ulan.
Nagpasalamat naman si Pornan sa tanan nga mga volunteer groups nga nagbulig sa ila sa rescue operations kun sa diin nagbulig naman kagab-i ang Philippine Army.
Suno kay Pornan, mahimo nga magtodo ang ulan bangud sa red rainfall warning nga gin-issue kaina sang aga.
