Nagapati ang iloy ni Kirt Lobaton, ang 24 anyos nga gin-abduct sa Kabankalan City kag ginpatay sa banwa sang Ilog nga ini ang nadalahig lamang sa atraso sang iya abyan nga si Nicole Java.
Sa interview sang Bombo Radyo Bacolod sa iloy ni Kirt, residente sa Hacienda Manaol, Brgy. Matab-ang, Talisay City, mabuot ang iya nga bata kag wala ini sang nakita nga rasun agud patyon ang biktima.
Suno diri, nagtrabaho sa Cebu ang iya bata, nagpauli makaligad sang duha ka semana agud kuntani kuhaon ang motorsiklo nga gamiton sini nga service padulong sa trabaho.
Una ini nga nagpahayag sa iloy nga siya ang sugaton pagdungka sang barko apang ini ang iya ginbawi bangod suno diri, siya ang maga-upod nalang sa iya abyan nga si Nicole Java nga sugaton man sang van.
Suno diri, bangod padulong sa Kabankalan City ang van, siya ang magapanaog na lamang sa Bago City sa iya amay.
Kwestyonable para sa iya ang pahayag ni Nicole kun paano sila gin-abduct kag ginpatay si Kirt.
Nahibaluan nga madamo sang nagapost sa social media nga nagasukot kay Nicole sa iya mga kautangan.
Si Kirt ang may pito ka igo sang bala sa lawas.
Siya ang una nga ihaya sa balay sang iya amay sa Bago City, kag itransfer sa balay sang iya iloy sa Talisay City.
Nagpanawagan man ini sang mabulig sang Talisay City government agud mahatagan sang hustisya ang pagpatay sa iya bata
