Isa sa ginaproblema sa Barangay Cabagna-an, La Castellana karun nga naglupok ang Bulkan Kanlaon amo ang supply sang tubig.
Sa interview sang Bombo Radyo Bacolod kay Barangay Secretary Alexander Lacson, ang paglupok sang bulkan ang natabo sa tion nga ang kadam-an sang mga Punong Barangay ang nagpadulong sa Cebu para sa seminar.
Pinaagi sa pagpanguna sang Kagawad in charge, ang mga evacuees ang ila nga ginhamtang sa eskwelahan.
Suno diri, alas-7:00 sang gab-i nag-umpisa na sila sa evacuation process.
Naghingagaw naman pauli ang ila nga Punong Barangay subong nga adlaw, agud makapatigayon sang emergency meeting.
Sila ang may natalana naman nga standby ambulance nga magadul-ong inkaso maglala ang sitwasyon sang mga pasyente.
Magluwas sa mga opisyal sang Barangay kag banwa sang La Castellana, nag-augment man ang Disaster Risk Reduction and Management Office, Philippine Coast Guard, Philippine Red Cross at Department of Social Welfare and Development.
Sa interview sang Bombo Radyo Bacolod kay Ariel Ramos, isa sa mga evacuees, indi nagid mapuslan ang iya mga utanon kag mais.
Suno diri, halos tanan nga mga pananom sa palibot nga natup-an sang ashfall ang namiyerdihan gid.
Pahayag pa sini nga bangod mainit ang abo, sa pagtupa pa lamang sini sa mga dahon, gilayon man nga nagalayong kag nagakalaya.
Ang nagkalamatay nga pananom man ang ginapaligban sang evacuee gikan sa Barangay Cabagna-an.
Suno kay Rose Mary Casag, sang adlaw na sila nagpadulong sa evacuation center bangod ginpili nalang nila magtinir sa sulod sang balay sang gab-i, ilabi na nga may kaupod nga mga magagmay nga bato ang ashfall.
Dugang pa sini nga sa Barangay Hall naghulag ang mga rescue team, gani ginpanilagan na lamang nila anay ang sitwasyon.
Ginakasubo sini nga ang mga utanon kaangay sa balunggay nga preska pa sang hapon antes ang paglupok sang bulkan, ang laya na sang sila ang magbiya sa ila balay.
